كوروب و لباسنك ياننده بر شخص ظاهر اولوب عورته خطاب ايتمشكه بن ديوم كه سكا عاشق اولوب بو نجه وقت سركردان اولدم و شمدى اكر زوجكى ترك ايدوب بنى قبول ايدر ايسك اسبابنى ويريرم و بندن سكاكلى مال دنيا حاصل اولور عورتدخى خوفندن انكله عهد باغليه‌رق اسبابنى كيوب وقوع حالى زوجنه كلوب خبر ويردكده مرسوم دخى خوفندن عورتى طلاق ايلدى و اول عورت ديوايله خانبالغده اولوب خاتون ديو واسطه سيله بعض بعيد محللرده واقع اولان مغيباتدن خبر ويرمكله خلق عالم اوزرينه جمع اولوب و هر كيم بر مرادايچون سؤال اتسه بر عجيب او از ظاهر اوله رق كمسه فهم ايده ميوب اول عورت ترجمه ايدر ايدى و كثرت شيوعندن شول حاله وارديكه عورتك خانه سنده تخته بندلر قوريلوب و اول ديوك مكاننه دخى بر تخت تعيين ايدرك اوكنه پرده‌لر چكوب از زمان ايچنده خلقدن بيحد سيم و زر حاصل ايلدى بعده بعض اقرباسى جمع اولوب خاتونه نصيحت ايتديلر كه اكر قضايا اول ديو سكا غضب ايدر ايسه حاصل اولان التون واقجه‌يى سندن الور مصلحت بودر كه سن بوميلغى اسباب املاكه صرف ايله كه الماغه قادر اولميه ديد كلرنده خاتون دخى انلرك كلاملرينى قبول ايدرك اول پاره‌يى املاك و اسبابه صرف ايلدى اتفاق بركون ديو خشمه كلوب عورتك نقدر نقد و اسبابدن جمع ايتديكى اشيا وارايسه جمله سنى الوب و خانه سنك و صاتون الديغى باغ و بستاننك در و ديوارك و اشجارك قلع و جمع ايدرك خراب و پريشان ايدوب كتدى شويله كه باغ و خانه‌سى اصلا تيمار و زراعته قابل اولميوب تلف اولدى اثر جن اول ديار ده بو وجهله اصلا مصروع اولماز باب الثانى عشر اول دياره مخصوص اولان هنرهاى عجيب و علاجهاى غريب بياننده در اول ديارده حيوانات سكرندن بر قماش دوزرلر كه وصف و تعريفنده قلم نكته بيان عاجز و ناتواندر و غريب علاجلرندن برى بودر كه برادمك قلبنده بر مرض اولسه سينه سين چاك ايدوب مرض اولان محلى بولورلر اكر زرداب ايسه شيرنغه ايله و يا سائر علت ايسه الات ايله الوب ينه اول كمسه نك معده سين و يا باغرصغين محلنه وضع و كمال هنر ايله زخمنى ديكوب علاج و مرهم ايتمسيله باذن الله تعالى اول المدن خلاص اولدى و اول ديارده بونك كبى عجائب و غرائب شيلر بيحسابدر فصل اول بلده ده طوب اوينامق خراباتيلرك كاريدر و طويلرى صغرك قاووغنى يعنى ابداننى اوفوروب و اغزينى باغليوب طوپ مثال ايدرلر خراباتده اولان ماه جبين دختر سعدت قرنيلر خلقه اولوب اول طوپى اورتيه